18 கலைஞர் ஒரு கட்சித்தலைவரா? அல்லது குடும்பத்தலைவரா- ஒரு அலசல்......

மகனா கட்சியான்னு வரும்போது கலைஞர் தன் மகனென்றும் பாராமல் அழகிரியை தூக்கி வீசிவிட்டு கட்சிதான் முக்கியம் என்று உணர்த்திவிட்டாராம். உடன்பிறப்புக்கள் புளகாங்கிதம் அடைகிறார்கள். மகன் முக்கியமில்லை கட்சிதான் முக்கியமென கலைஞர் நினைத்திருந்தால் தா.கி. கொலை வழக்கில் அழகிரி சிக்கியபோதே அவரை தூக்கி வீசியிருக்கனும். அல்லது தினகரன் சர்வே பிரச்சினையின் போதாவது தூக்கி எறிந்திருக்க வேண்டும். அட்லீஸ்ட் செயல்படாத மத்திய அமைச்சராக இருந்த போதாவது தூக்கி வீசியிருக்க வேண்டும். மாறாக, அப்போதெல்லாம் கழக தலைவர் என்பதை கலைஞர் மறந்து அழகிரியின் அப்பாவாகத்தான் நடந்து கொண்டார் என்பதை யாரும் மறந்திருக்க மாட்டார்கள்.

ஒரு மகனுக்கு பொருளாளர் பதவி என்றால் இன்னொரு மகனை சமாதான படுத்த தென் மண்டல செயலாளர், ஒரு மகனுக்கு துணை முதல்வருன்னா அனுபவமே இல்லாத இன்னொரு மகனுக்கு மத்திய அமைச்சர் பதவின்னு தந்தையாகத்தான் நடந்துகொண்டார் கலைஞர் கட்சித்தலைவர் என்ற அதிகாரத்தை பயன்படுத்தி, தென்மண்டல அமைப்பு செயலாளர் என்ற பதவியை அழகிரிக்காவே உருவாக்கியதாக சமீபத்தில் வாய் திறந்தார். வட மண்டல செயலாளர் என்றோ, கிழக்கு மண்டல செயலாளர் என்றோ, மேற்கு மண்டல செயலாலர் என்றோ மத்திய மண்டல செயலாளர் என்றோ வேறு எந்த மண்டலத்திற்கும் செயலாளர் பதவி இல்லாத போது தென் மண்டலத்திற்கு மட்டும் செயலாளர் பதவி என்பதே அழகிரி தன் மகன் என்பதற்காகத்தானே? சரி......தென் மண்டலத்தில் இதற்கு முன் இப்படிப்பட்ட பதவி இருந்து அதில் காவேரி மணியனோ, பொன் முத்தோ, பழனிவேல்ராஜனோ இருந்திருந்தால் கூட இப்போது அழகிரி அந்த பதவியை தொடர்ந்தார் எனலாம். அதற்கும் வழியில்லை.

தினகரன் சர்வே பிரச்சினையில் மாறன் குடும்பத்திற்கும், கலைஞர் குடும்பத்தினருக்கும் பிரச்சினை வந்து தயாநிதி மாறன் பதவி விலகிய போது டெல்லியில் லாபி செய்ய அப்போது தேவைப்பட்டது கனிமொழிதானே தவிர, கட்சியை வளர்க்க பாடுபட்ட கடைசி தொண்டர் அல்ல.....கனிமொழி கழகத்தலைவர் மகள் என்பதற்காக பதவி பெற்றாரா? அல்லது களப்போராளி என்பதற்காக பதவி பெற்றாரா என்று உங்கள் மனசாட்சிக்கே விட்டு விடுகிறேன்.

இப்போது கூட அழகிரிக்கும் ஸ்டாலினுக்கும் வாரிசுப்போர் என்றதும் ஒரு கட்சியின் தலைவராக இரண்டு பேரையும் சமாதானப்படுத்தியிருக்கணும். அல்லது உங்கள் இரண்டு பேரால்தான் அண்ணா ஆரம்பித்த இயக்கத்திற்கு கெட்ட பெயர் என்று அவர்களை கட்சியிலிருந்து இடைக்கால நீக்கம் செய்திருக்க வேண்டும். இப்படி செய்திருந்தால் அவர் கட்சித்தலைவராக செயல்பட்டார் என்று சொல்லலாம். மாறாக, அழகிரியை மட்டும் தூக்கி வீசிவிட்டு ஸ்டாலினை தன் பக்கத்தில் வைத்திருக்கும்போதே தெரியவில்லை கலைஞர் ஸ்டாலினுக்கு அப்பாவாகவும், அழகிரிக்கு கட்சித்தலைவராகவும் இரட்டை குதிரையில் சவாரி செய்து இப்பவும்ஒரு மகனை காப்பாற்றிதான் இருக்கிறாரென்று.....ஆனாலும், இன்று ஸ்டாலினை கலைஞர் அரவணைக்க காரணம் இல்லாமலில்லை. ஸ்டாலின் திணிக்கப்பட்ட தலைவராக இருந்தாலும், பின்னர் தகுதியை வளர்த்துக்கொண்ட தலைவரும் கூட. கலைஞருக்கு இணையாக தமிழகம் முழுவதும் சுற்றி தொண்டர்களின் ஓட்டை கவரும் முகம். அழகிரி கலைஞரின் மகனாக தொண்டர்களால் அறியப்பட்டாலும் அவரின் செல்வாக்கு என்பது மதுரையை சுற்றித்தான். ஆனால், தமிழகம் என்பது மதுரை மட்டுமல்ல......

முரசொலி மாறன் தவிர்த்து அழகிரி, ஸ்டாலின், கனிமொழி, தயாநிதி மாறன் என்று கலைஞரின் இத்தனை குடும்ப அரசியலையும், குடும்ப திணிப்பையும் தொண்டர்கள் சகித்துக்கொண்டதற்கு காரணம், எம்.ஜி.ஆர்.,வைகோ போன்றவர்களால் தி.மு.கழகம் எத்தனையோ பிரிவுகளையும், பிளவுகளையும் சந்தித்தாலும் கட்சியை கட்டுக்கோப்பாக வழி நடத்தியதற்கு நன்றிகடனாகத்தான். இதுவே வேற ஆள் தலைமையில் இந்தக்கட்சி இருந்திருந்தாலும் இந்நேரம் காணாமல் போயிருக்கும். அடுத்ததாக, ஸ்டாலினை தொண்டர்கள் ஏற்றுக்கொண்டதற்கு காரணம், இந்திய அரசியலிலேயே எமெர்ஜென்சியின் போது ஒரு முதலமைச்சரின் மகன் உதை பட்டார் என்றால் அது ஸ்டாலினாகத்தான் இருக்கும். இத்தனைக்கும் அவர் புது மாப்பிள்ளை. அன்று அவர் மேல் விழுந்த அடிகளை மட்டும் அப்போதைய சென்னை மேயர் சிட்டிபாபு குறுக்கே விழுந்து தடுக்கவில்லை என்றால், இப்போது ஸ்டாலின் என்ற ஒருவர் இல்லாமலேயே போயிருக்கலாம்....அத்தனை அடி உதைகளை தாங்கித்தான் இன்று உயர்ந்திருக்கிறார். அந்த தியாகத்திற்காகத்தான் அவரை தொண்டர்கள் குடும்ப அரசியலை மீறி ஏற்றுக்கொண்டார்கள். அதற்காக அழகிரியையும், கனிமொழியையும், மாறனையும் தொண்டர்கள் ஏன் ஏற்றுக்கொள்ள வேண்டுமா என்ன?

இறுதியாக கலைஞருக்கு ஒரு வேண்டுகோள்.....தெரிந்தோ தெரியாமலோ கட்சிக்குள்ளும் குடும்பத்துக்குள்ளும் ஒரு கலகத்தை ஆரம்பித்து வைத்துவிட்டீர்கள். இதே குழப்பத்தோடு குழப்பமாக தலைவராக ஸ்டாலினை உடனே நியமித்தால் தான் திமுக தமிழகத்தில் அதிமுகவுக்கும் வளர்ந்து வரும் புதிய கட்சிகளுக்கும் பலமான போட்டியைக் கொடுத்து இளைஞர்களின் வாக்குகளைக் கவர முடியும். ஏனெனில் தி.மு.க.,வை பொருத்தவரை உங்களுக்கு அப்புறம் வாக்குகளை கவரும் சக்தி ஸ்டாலினுக்குத்தான் இருக்கிறது. இனி உங்களால் பழையபடி பிரச்சாரத்திற்கு அலைய முடியாது. உங்கள் உடல்நிலையும் அதற்கு ஒத்துழைக்காது. ஆகவே நீங்க இருக்கும்போதே அவரை தலைவராக அறிவிப்பதுதான் இப்போது கட்சிக்கு நல்லது. அவசியமும் கூட...........

Tweet

Post Comment

இதையும் படிக்கலாமே: