10 ஜெயலலிதாவின் பிரதமர் கனவு சாத்தியமா? -ஒரு அலசல்......

40 தொகுதிகள் மட்டுமே இருக்கிற தமிழ்நாடு+பாண்டிச்சேரி மாநிலங்களில் எத்தனை தொகுதிகளில் வெற்றி கிடைக்கும் என்றே தெரியவில்லை. அதற்குள் என் கட்சியினர் விருப்பம் இது என்று பிரதமர் கனவில் மிதக்க ஆரம்பித்துவிட்டார் தமிழக முதல்வர் ஜெயலலிதா. தமிழ்நாட்டில் இருக்கும் கட்சியினர் மட்டும் முடிவெடுத்தால் போதுமா? அகில இந்திய மக்களும் அல்லவா அந்த முடிவை எடுக்கணும்?.  சரி, ஜெயலலிதாவோ அதற்காக எந்த ஒரு விஷயத்தையும் முன்னெடுத்ததாக தெரியவில்லை. அதற்குள் கொடநாடு ஓய்விற்கு சென்றுவிட்டார். கடந்த சட்டமன்ற தேர்தல் போல், கடைசி நான்கரை வருடங்கள் ஓய்வில் இருந்துவிட்டு கடைசி ஆறுமாதத்தில் வெளியே வந்து வாக்குகளை அள்ளிவிட்டதுபோல், இப்போதும் அள்ளிவிடலாம் என்று நினைத்துவிட்டார் போலும்.

ஒருவேளை நாற்பது தொகுதிகளில் அப்படியே வெற்றி பெற்றாலும்கூட, ஜெயலலிதாவின் பிரதமர் கனவு எப்படி சாத்தியமாகும் என்று தெரியவில்லை. தமிழகத்தில் இருக்கும் நாடாளுமன்றத் தொகுதிகளை விட அதிகமான  தொகுதிகளை உள்ளடக்கிய(80 தொகுதிகள்) உ.பி.,யில் முலாயம், மாயாவதி என்று இரு ஜாம்பவான்கள் இருக்கிறார்கள். ஆனால், அவர்கள் பிரதமர் கனவு கண்டதாக தெரியவில்லை. ஏறக்குறைய தமிழகம் போல மக்களவை தொகுதிகள் இருக்கும் மேற்கு வங்காளத்தில்(42) மம்தா இருக்கிறார். பீகாரில்(40) லாலு இருக்கிறார். 48 தொகுதிகள் இருக்கும் மஹாராஷ்டிராவில் சரத்பவார் இருக்கிறார். ஆனால், இவர்கள் பிரதமர் கனவில் இருக்கிறார்களா என்று தெரியவில்லை. முதலில் இவர்களை நிலையை தெளிவுபடுத்தினால் ஜெயலலிதாவின் கனவு சாத்தியமா? வெறும் கனவா என்று சொல்லமுடியும்....ஏனென்றால் இந்தியாவின் பெரும்பான்மை தொகுதிகள் இங்குதான் இருக்கிறது. ஏறக்குறைய 200+ இவர்களை மீறித்தான் ஜெயலலிதாவுக்கு பிரதமர் கனவு பலிக்கவேண்டும்.

ஒருவேளை இவர்களுடன் கூட்டணி வைத்து மூன்றாவது அணியை உருவாக்கினால்கூட, இவர்கள் அனைவரும் ஜெயலலிதாவை பிரதமர் வேட்பாளராக ஏற்றுக்கொள்வார்களா என்பது சந்தேகமே.....ஒரு உறைக்குள் எத்தனை கத்திகளை சொருகுவது?

தேவகவுடா, குஜ்ரால் கூட பிரதமரானார்களே என்று கேட்கலாம். தேவகவுடா நிலை வேறு.......அப்போது காங்கிரஸ் தோற்றதும் உடனடியாக ஐக்கிய முன்னணி என்று ஒரு அணியை உருவாக்கி அதன் பிரதமராக தேர்வு செய்யப்பட்டவர் அவர். ஆனால், அவர் யாருக்கும் தலைவலி கொடுக்கவில்லை. அவர் உண்டு.....அவர் தூக்கம் உண்டுன்னு இருந்தார். ஆனால், ஜெயலலிதா அப்படிப்பட்டவர் அல்ல.... எந்த அணியை அமைத்தாலும், தான் பிரதமராக வேண்டும் என்று சொல்வார். தன் தலைமையை முன்னிறுத்துவார். தான் தான் பிரதமராக வேண்டும் என்று வலியுறுத்துவார். 40 தொகுதிகளுக்கே இப்படி என்றால் முலாயம், மாயாவதி போன்ற 80 தொகுதிகள் வைத்திருப்பவர்களுக்கு?.....

கர்நாடகா 28, ஆந்திரா 42, கேரளா 20 என்று நம்மை சுற்றிய அண்டை மாநிலங்களில் 90 தொகுதிகள் இருக்கிறது. இங்கே தலைவராக இருக்கும் தேவகவுடா, சந்திரபாபு நாயுடு போன்ற தலைவர்கள் கூட ஜெயலலிதாவை ஏற்றுக்கொள்வார்களா என்பது சந்தேகமே? இதில் தேவகவுடா கூட ஜெயலலிதா பிரதமராக வந்தால் சந்தோஷமே என்றுதான் சொல்லியிருக்கிறாரே தவிர, ஜெயலலிதா பிரதமர் ஆக நான் ஆதரவு தருவேன் என்று சொல்லவில்லை என்பது கவனிக்கத்தக்கது.

இறுதியாக.......
ஜெயலலிதாவின் பிரதமர் கனவு என்பது அவ்வளவு சுலபமாக சாத்தியப்படும் என்று எனக்கு தோன்றவில்லை. ஒருவேளை தமிழகம் இந்தியாவிலிருந்து தனி மாநிலமாக பிரிக்கப்பட்டால் கூட, இங்கும் தி.மு.க., தே.மு.தி.க.,என்று பலத்த போட்டியை சந்திக்க வேண்டியிருக்குமே தவிர, நினைத்த மாத்திரத்தில் பிரதமராகவெல்லாம் ஆகிவிட முடியாது.

Tweet

Post Comment

இதையும் படிக்கலாமே: